ما تتخضش كده ... ايوه وثنية
وثنية مشتقة من الاصل اللغوي وثن
والوثن حاجه زي الصنم ... وبيستخدموا كتير بالتبادل زي ما عمنا ابن منظور بيقول في لسان العرب " الصنم معروف واحد الأصنام، يقال إنه معرب شمن وهو الوثن. قال ابن سيده وهو ينحت من خشب ويصاغ من فضة ونحاس والجمع أصنام وقد تكرر في الحديث ذكر الصنم والأصنام وهو ما اتخذ إلها من دون الله، وقيل هو ما كان له جسم أو صورة فإن لم يكن له جسم أو صورة فهو وثن، وروى أبو العباس عن ابن الأعرابي الصنمة والنصمة الصورة التي تعبد، وفي التنزيل العزيز: وَاجْنُبْنِي وَبَنِيَّ أَنْ نَعْبُدَ الْأَصْنَامَ. قال ابن عرفة: ما تخذوه من آلهة فكان غير صورة فهو وثن فإذا كان له صورة فهو صنم خشب أو حجر أو فضة ينحت ويعبد والصنم الصورة بلا جثة ومن العرب من جعل الوثن المنصوب صنما" ، والوثن كأصل لغوي يعني شئ مستقر ... واتقال علي الاصنام أوثان علشان الناس استقرت علي عبادتها ... ووصلوا لمرحلة انهم بيعبدوها ومش عارفين بيعبدوها ليه !!!
يعني باختصار ... وثنية دي يعني تهتم بشئ وتبقي مقتنع بيه تماما تماما بدون ما تفكر ... وقد تصل للعبادة ليه ... الشئ ده ولا حاجه في حد ذاته من غير ما يعبر عنه ويمثله !!
طيب دول الكفار الوحشين يا عم ... انت مالك بقي بتخرف ليه ... ما كلنا مسلمين او مسيحين وبنعبد ربنا والحمد لله
طيب تعالي اقولك قد ايه احنا بقينا وثنيين ؟!! وبس مابقتش وثنية دينية .... ده بقي عادة مجتمعية متأصلة
وثنية دينية:
العزا لازم يجي فيه مقرئ بالشئ الفلاني ... لما حد يرمي عليك سلام تقولوا وعليكم السلام ورحمة الله وبركاته ... الصلاة علي النبي مثلا .... تقول آمين ورا اي حد يقولك دعاء .... وتلبس جلابية ... والبنت لازم تتحجب ... ونذبح عقيقة .... مش بس كده ... اي حد يكلمك عن دينك تاكله أكل ....
كام واحد بقي بيصلي وبيؤدي فروضه ؟! ... وكام واحد عارف سنة نبيه الزين صلي الله عليه وسلم ؟ ... كام واحد فاهم اركان دينه ال5 وأداها ... تعرف ايه عن تاريخ الرده في دينك ؟ تعرف ايه عن شيع المسلمين ؟ ... تعرف ايه عن حادثة الافك ؟ ... تعرف ايه عن سيرة النبي نفسه ؟؟ ... مسيحي ؟؟؟ طيب تعالي ... رحت الكنيسة كام مرة طول السنة ؟؟ تعرف ايه عن مذاهب دينك ... بتصلي ؟! بتصوم ؟؟
لا كل ده مش مهم ... بس بنتقابل عند السفارة دول شتموا النبي ... طيب وانت ما أسأتش للنبي ؟! إبدأ بنفسك !!!
وثنية اجتماعية:
الفرح لازم يكون في فندق 5 نجوم ... والمطرب س يجي ... والنيش ابو 70 طقم مدهب وصيني وكريستال ... والنجفة الكريستال برضو والا الفرح يبوظ وتبقي عيشة العريس والعروسة ضلمة .... وثنية ... الجواز اصلا معناه زوجين يسكنوا لبعض ... مش يسكنوا في شقة 393829320390 متر سوبر لوكس ! .... مش مهم ... المهم الفرح ... كان حلو ولا وحش ... ومن غيره مافيش جواز اصلا !!! ....
وثنية ... غطاء الرأس للبنت ... ولو اللي تحت الغطاء دي ايه ... تبقي مؤدبة ومحجبة ... التانية وحشة ... بلاش منها ... برضو وثنية .... الغطاء يا خلق هو مش القضية ... اه مهم واه واجب ديني ... بس مش علشان هو غطاء ... علشان ما يقصد به الغطاء نفسه !
وثنية سياسية:
وعن هذه الوثنية حدث ولا حرج .... شعارات رنانة ... خلفها خواء أو خراء -أيهما أقرب- فكري ... المهم يبقي فيه انتخابات ... وشكل سياسي واضح ... ايه اللي في الخلفية ... مش مهم ... المهم الشكل العام
يا خلق يا بشر ....ابحث عن المعني يا عبد الصورة ... ولما تلاقيه خده واطلع من الخرابة !!!
فيه مقولة قالها ابراهيم عيسي رغم اني مش بطيقه لكن صحيحة ..
ردحذفالشعب المصري عامل زي الواد الي راح الخرابة أول مرة مخصوب و تاني مرة راحها بمزاجه لحد ما بقت هوايته ..
المقاله قيمه بإستثناء الجزء الخاص بالحجاب فلي تحفظ عليه
ردحذففمثلا لو طالب عنده في السنه اربع مواد
واحده صعبه وثلاثه سهلين نقوم نفكر ان الصح اننا نركز على الصعبه الاول علشان نجيب فيها الدرجه النهائية ونضيع الثلاثه السهلين ؟
ده المطلوب الاعلام حطه في دماغ الناس . الدين الاسلامي نصفه بالجسد ونصفه بالروح مينفعش تاخد نصف وتسيب نصف
يعني في حاجات في الدين الاسلامي سهله انك تنفذها وهتاخد عليها ثواب وفي حاجات هيكون فيها مشقه
ده مطلوب وده مطلوب ولاثنين مهمين
ده ممكن تاخد ثواب فقط بالمظهر بدون ان تفعل اي شئ فلو ذكر الناس رؤيتك بالله والاسلام فانت ستؤجر على هذا
يعني واحده محجبه (الحجاب الشرعي) كده مشيت نصف الطريق. ملتزمه بتعاليم الاسلام (صلاة وصوم و...) كده مشيت النصف الثاني
طب لو عكسنا واحده ملتزمه بتعليم الاسلام (صلاة وصوم ....) ومش محجبه ، مش منطقي لان المظهر اول دليل على الجوهر
بمعني لو حضرتك اشتريت شوكولاته جلاكسي هتلاقيها مغلفه بشكل جيد بس لو كانت مغلفه بوقه متسخه فلن تفكر اصلا ان تفتحها لتتذوق طعمها